مين افضل مطابخ الألمنيوم ولا الخشب

طبعاً المطابخ كثير أنواع وأختيارها برجع للرغبة الشخصية وحسب الإمكانيات بالدرجة الأولى وحسب طبيعة الشغل وحسب المحافظة عليها ،

وكل أنواع المطابخ إلها ميزات وعيوب ومافي نوع منها إلا وإله عيوب منقدر نتفاداها بشوية إهتمام ونعرف شو اللي بفيدها وشو اللي بضرها .

وبالنسبة لمطابخ اللامنيت من ميزاتها إنه منظرها مودرن وخيارات أشكالها وألوانها كثيرة وبتتحمل حرارة وما بتبقع وسهلة التنظيف ومقاومة للخدش ،

ومن عيوبها أنه أغلبها من خشب ال mdf اللي بتأثر بالمي بشكل كبير وإذا ما كانت حواف الخشب مقفلة صح ممكن تنفش وتخرب ، بالإضافة لمشاكل الفصالات وربط البراغي ، غير قابلة للفك والتركيب عدة مرات ، وغير قابلة للدهان والتجديد ، بس إذا كانت من خشب اللاتيه أو المعاكس الوضع بيختلف بس بظل مسألة تقفيل الحواف لازم تكون محكمة التقفيل مع إعتماد المسح والتنظيف باستمرار وتجنب كبكبة المي بتخدم سنين .

وبالنسبة لمطابخ الألمنيوم وخصوصاً الصولد لأنها بتحتوي على كمية كبيرة من الألمنيوم سواء بالقواطع والحشوة الشرحات والفرمايكا فمن ميزاتها أنه بتتحمل حرارة وتلييف وتنظيف وكبكبة مي ، وهي أكثر خدمة من هالناحية من مطابخ اللامنيت ،

ومن عيوبها أنه خيارات أشكالها وألوانها محدودة بالإضافة لمشاكل الفصالات وربط البراغي فإذا فرك برغي لازم يتركب برغي أكبر منه أو ينثقب بمكان ثاني فبتشوه المكان كله ، وزواياها حادة وغير قابلة للدهان والتجديد ، بس إذا كانت مشغولة صح ومركبلها أكسسوارات أصلية بتخدم سنين من غير مشاكل .

والألمنيوم طبعاً أرخص من اللامنيت ، والإثنين فيهم ميزات وعيوب وبدهم محافظة واهتمام ، واختيار واحد منهم برجع للرغبة وحسب الإمكانيات وطبيعة الشغل والحياة اليومية ،

يعني اللامنيت أفضل من ناحية الجمالية بس بده ديرة بال من ناحية كبكبة المي واستخدام إكسسوارات أصلية ،

والألمنيوم أفضل من ناحية الخدمة وتحمل كبكبة المي بس بده ديرة بال من ناحية الحواف الحادة ومشاكل البراغي والفصالات واستخدام إكسسوارات أصلية .